„Með réttri stefnu býrðu til leikreglur en menning ræður því hvernig leikurinn verður spilaður“: Skilvirkni ferla í þjónustufyrirtæki með straumlínustjórnun

Rannsókn þessi fjallar um aðferðafræði straumlínustjórnunar og þær aðferðir sem hægt er að nýta til þess að ná fram skilvirkum verkferlum. Skipulag og aðferðir straumlínustjórnunar heilla rannsakanda til hins ítrasta, þar sem skýr markmið hafa komið viðkomandi langt og sýnt fram á árangur í daglegu amstri. Rannsakandi hefur náin tengsl við starfsmann á umræddu þjónustuverkstæði og kviknaði hugmynd að rannsókninni í samtali þeirra á milli. Rannsóknin var unnin í nánu samstarfi við þjónustuverkstæðið sem framkvæmir breytingar á RAM-bifreiðum. Markmið rannsóknarinnar var að koma auga á og eyða sóun sem á sér stað innan fyrirtækisins. Fáar rannsóknir hafa verið framkvæmdar innan íslenskra fyrirtækja með tilliti til þeirra verkfæra sem hægt er að nýta m.t.t. straumlínustjórnunar. Með því að eyða sóun verður til staðar aukin skilvirkni og meiri árangur sem leiðir af sér betri þjónustu til viðskiptavina. Framkvæmd var eigindleg rannsókn sem samanstóð af viðtölum og vettvangsheimsókn. Tekin voru hljóðrituð viðtöl við þrjá starfsmenn og voru þau viðtöl kóðuð. Allir viðmælendur áttu það sameiginlegt að lýsa ákveðinni tegund sóunar, m.a. tímatapi, vannýtingu hæfileika starfsmanna, flutningum, biðtíma og birgðastöðu. Það er því tækifæri fyrir fyrirtækið til að gera ferlið skilvirkara með betri nýtingu starfsmanna. Annmarkar rannsóknarinnar eru þó að fyrirtækið sem um ræðir er ekki stórt og hefur þjónustuverkstæðið aðeins verið starfrækt í um fjögur ár, eða frá 2016. Þó hefur fyrirtækið langa sögu af sölu nýrra og notaðra bifreiða en ekki er mikil reynsla af þeim breytingum bifreiða sem hér eru rannsakaðar.Verkefnið er lokað í 5 ár með samþykki Viðskiptafræðideildar